Oleh: H Masoed Abidin
*Adat Badunsanak ….*
DUNSANAK Samo di Paliharo.
Kalau Ratak, Ratak Tanah,
Usah Bak Rataknyo Galeh,
Kalau Cabiak Cabiak Bulu Ayam
Usah Cabiak Daun Kaladi,
Kalau Pacah Pacahnyo Aia,
Jan Sampai Takah Pacahnyo Batu,
Coitu Bana Nak Samo Manjago
Dunsanak Sakampuang
Samo Manjago Kampung.
Dunsanak Sapasukuan
Samo Manjago Dalam Suku..
Bak Awua Jo Tabiang Saling Sanda Manyanda Kaduonyo..
Adat Hidup Tolong Manolong…
Adat Mati Janguak Manjanguak…
Adat Manusia Samo Munfakat…
Cilako Manusia Dek Silang Sangketo…
Kok Kakurangan Tukuak Manukuak..
Kok Sampik Samo Lapang Malapangi…
Condong Samo Tungkek Manungkek…
Kok Rabah Samo Tupang Manupangi…
Tatilantang Samo Minum Air.
Tatilungkuik Samo Makan Tanah…
Tarapuang apuang samo hanyuik
Tarandam randam Samo basah .
Sarimpang bak kunik.
Sarumpun bak batuang.
Sakabek sagulung bak siriah.
Saikek bak umpamo sapu lidi.
Sarumpun bak Sarai.
Satampuak bak pinang.
Sadanciang bak basi.
Saciok nan bak ayam.
Sakain ,sabaju,
salapiak sakatiduran.
Sabanta sakalang hulu.
Susah sanang Samo di raso
Satitiak Samo di tampungan
Saleleh Samo di palik.
Sanyao balain badan.
Bak saparuik saparindua’an.
Kaba baiak bahimabauan,
kaba buruak bahambauan,
*Satantang diri urang sa limbago
badunsanak …*
*bak umpamo*
Hanyuik Samo di pinteh
Tarandam Samo basah
Tabanam Samo di silam
Ta hampai Samo kariang
Hilang Samo di cari
Sakik samo ma aduah
Tuah Samo Sakato
Jauah cinto-macinto
Hino Samo menutupi
Dakek jalang manjalang
Singkek Samo mauleh
Panjang Samo mangarek
Senteang bilai manbilai. (analisa)
